Sco usità cuzza la sessiun extra muros quatter dis. Il center d'events Arena a Claustra vegn transfurmà dals 12 enfin ils 15 da zercladur en ina sala da cussegl. L'intent da la sessiun ordaifer Cuira è che las parlamentarias ed ils parlamentaris vegnan en contact cun la populaziun.
Il Cussegl grond ha in program pulpì cun ina revisiun parziala d'ina lescha e passa 50 dumondas ed incumbensas. Fatschentas grondas olitics na datti betg. Tranter auter vegn tractà:
- divers rapports annuals: p.ex. Viafier Retica, Banca chantunala e FHGR
- Quint annual dal chantun: tschertas fracziuns han gia annunzià da vulair pretender da sbassar taglia chantunala
- elecziun dal presidi e vice-presidi da la regenza: Jon Domenic Parolini ch'è uss vice-president daventa president
- la revisiun parziala da la lescha davart l'assicuranza da malsauns e la reducziun da las premias: ina midada pretendida da la lescha federala e ch'è pauc dispitaivla
- diversas dumondas ed incumbensas che pertutgan la mancanza d'abitaziuns e la planisaziun locala
Raiver, yoga, e-bike ed inscunter cun la populaziun
Sper il program politic datti a la sessiun extra muros er adina program accumpagnant. Questa giada han las parlamentarias ed ils parlamentaris la chaschun da scuvrir las sendas da velo cun in e-bike, da raiver sin la famusa Sunnibergbrücke e sa stender cun far yoga. La mesemna saira s'inscuntran ils politichers cun la populaziun. Cunquai ch'igl è in onn d'elecziun franc ina chaschun da bajegiar punts e perschuader in u l'auter da las ideas politicas.
L'ultima giada è la sessiun extra muros stada il 2019 a Puntraschingna. Avant hai dà talas a Mustér, Tavau, Landquart, Poschiavo, Samignun ed Arosa. Durant la pandemia aveva il Cussegl grond tegnì trais giadas sia sessiun a Tavau.