La dretgira regiunala e chantunala dal Grischun ha decidì 13 cas nua che persunas na ston betg ir en praschun mabain en ina clinica per laschar far terapia – e quai entaifer il davos in onn e mez. Normalmain datti be dus ulteriurs cas e perquai hajan els era be gì budgetà quels, di il manader da l'Uffizi per l'execuziun giudiziala Mathias Fässler envers il schurnal regiunal dad SRF. Cun l'augment nunspetgà dals cas sajan era ils custs per quella procedura creschids.
Ils motivs èn intscherts
Daco ch'i ha dà quest grond augment na sa era l'uffizi responsabel betg sa declerar. E na betg mo els: Era la cumissiun da gestiun dal Cussegl grond scriva en ses rapport ch'els na possian betg declerar quest svilup. Medemamain è era il president da la dretgira chantunala dal Grischun, Remo Cavegn, surdumandà. La giurisdicziun, pia la moda e maniera co ils cas vegnan giuditgads, n'haja betg sa midà. Forsa ch'i saja simplamain ina casualitad, di el sin dumonda dal schurnal regiunal dad SRF.
Dubel uschè char
Tge ch'è dentant cler: Quest augment da cas chaschuna dapli custs. L’Uffizi per l'execuziun giudiziala dovra quest onn enstagl da 2,3 milliuns, passa 4 milliuns francs. Daners da taglia na vegnan dentant betg duvrads per quai. Ils uffizis regleschian quai tranter els, declera Mathias Fässler. Perquai che quels dus uffizis sa gidan in a l'auter, restan ils custs supplementars entaifer il departament responsabel ed i dat uschia naginas consequenzas finanzialas.
Dapli daners era en l'avegnir?
Era la cumissiun da gestiun dal Cussegl grond haja acceptà questa midada da daners entaifer ils uffizis, di Mathias Fässler. Uschia saja quella situaziun reglada per il mument. Perquai ch'ins na sa dentant anc adina betg il motivs per quest augment da cas, na san ins era betg tge che spetga l'auter onn. Mathias Fässler quinta perquai ch'il chantun dovri era l'auter onn dapli daners per il «Massnahmen-Vollzug». Auter sch'i saja propi stà in'excepziun quest onn.