Sonda suentermezdi hai dà en il territori Ponte Isola sut San Bernardino sin la via A13 ina vehementa collisiun frontala tranter dus autos da persunas. Ina persuna è morta. Quai scriva la Polizia chantunala.
Enturn las 11:40 è entrada tar la Polizia chantunala l’annunzia d’ina collisiun frontala sin la via d’autos A13. Per motivs anc betg sclerids hai dà en il sectur da la Ponte Isola tranter dus autos da persunas da l’exteriur ina vehementa collisiun frontala. Tar quella collisiun è ina persuna anc morta sin il plaz d’accident.
Duas ulteriuras persunas èn vegnidas provedidas medicinalmain tras la Rega al lieu e lura transferidas en in stadi critic en l’ospital Civico a Lugano ed en l’Ospital chantunal a Cuira. Tar ils vehichels participads sa tracti d’ina vart d’in bus da VW cun numers tudestgs e d’in VW Golf cun numers talians. Durant radund trais uras è l’A13 stada serrada per tut traffic.
L'andament exact da l'accident vegn sclerì da la procura publica e da la Polizia chantunala dal Grischun. La procura publica e la Polizia chantunala dal Grischun tschertgan perditgas ch'han pudì observar l'accident.