La dumengia suentermezdi è in mattet crudà en in aual. Suenter plirs tschients meters, nua che l'aual va en la Landquart, ha el pudì vegnir spendrà.
Pliras famiglias èn sa scuntradas sin ina plazza da giugar en il guaud sur Waldhof a Saas en il Partenz. Ellas han grillà ed ils uffants hajan giugà, scriva la Polizia chantunala dal Grischun. Lura haja in buob da sis onns vesì sco in mattet da trais onns è crudà en il Trochenbach ed è vegnì tschiffà da l’aual. El haja immediat dà alarm e clamà ils creschids ch’han empruvà da spendrar il mattet.
L’uffant è vegnì stratg bun 350 meters da l’aual giu – quai munta ad ina differenza d’autezza da 160 meters – ed ha pudì sa tegnair vi dad in crap curt avant che l’aual mainia en il flum Landquart.
Là hajan dus umens da la gruppa chattà il mattet e pudì salvar el. La Rega ha sgulà l’uffant e ses bab en l’Ospital chantunal a Cuira. El saja per fortuna blessà be levamain.
