La cassa da pensiun dal Grischun ha pudì nudar l'onn passà il meglier resultat d'investiziun dapi ch'i dat l'instituziun independenta da dretg-public, l'onn 2008. Quai cun ina rendita da 9,2% sin las investiziuns da facultad da passa 3 milliardas francs.
Sco quai che la cassa da pensiun communitgescha, saja il grad da garanzia restà constant tar radund 103%. La raschun che quel na saja strusch creschì, sajan reservas tecnicas da passa 197 milliuns francs ch'ins haja stuì far.
La cassa da pensiun dal Grischun ha plinavant pudì nudar 2% dapli clients. En tut èn quai stadas l'onn passà 12'186 persunas assicuradas e persunas ch'han retratg ina renta. Ultra da quai han ils custs d'administraziun per persuna pudì vegnir sbassads da 126 francs il 2018 sin 118 francs. La quota dals custs totals da l'administraziun da la facultad munta sco gia l'onn avant a 0,2%.