Punts musicalas - «Sin l'entir mund è la musica la medema lingua»

Artists ed artistas dal Libanon, da l'Iran, or da la Tirchia ed auters pajais han sunà ensemen cun musicists indigens. Gia durant il soundcheck han bleras persunas giudì l'atmosfera. Las famiglias dals participants e participantas èn gia stadas da la partida ed han nizzegià la schanza da sa barattar e far termagls.

Per Noel Patscheider ina situaziun betg spetgada. Ins quintava che las famiglias vegnian per la saira, di l'organisatur da la saira. El fa servetsch civil en il center da transit ed ha gì l'idea da far musica cun fugitivs e fugitivas.

Musica da l'entir mund

Chanzuns tradiziunalas da Nadal, hits da rock e pop – sco «Another Brick In The Wall» da Pink Floyd – ma era tuns da la patria dals fugitivs aud'ins durant il concert. I vegn sunà cun keyboards, battaria, tschintg ghitarras ed Baglama, in instrument or da la Tirchia che vegn era numnà «Saz».

La chanzun «Kezî Zerê» («chavels blonds») che dus umens curds sunan animescha il public da levar en pe e sautar davant tribuna. Ina reacziun spontana che fa era impressiun ad Alena Seifert, la chantadura da la saira.

Pausa culinarica

Suenter la chanzun dals chavels blonds hai dà ina pausa da mes'ura e la pussaivladad da mangiar spaisas da l'entir mund, cuschinà da participants e participantas da la saira. Igl ha dà humus, spaisas da Sri Lanka, da la Tirchia, Venezuela e blers auters lieus.

Era da la partida è Hayrettin Celik, in dals dus musicists ch'ha sunà la chanzun dals chavels blonds. El è in Curd, dapi dus onns en Svizra e suna dapi 30 onns l'instrument Baglama. Per el èsi cler che la musica na fa nagina differenza e collià culturas.

Per ils organisaturs èsi in grond success che la Postremise n'è betg mo stada emplenida mabain pli che plaina e tuts e tuttas han giudì il concert e las spaisas.