En il Grischun van intgins utschels sco l'evla da la pizza ed il falcun pelegrin a cuar en paraids-crap stippas. Pilots e pilotas da parasguladers van er là a sgular, perquai che la termica è là ideala. Las siluettas dals parasguladers disturban dentant ils utschels durant il cuar.
David Jenny, ch'è collavuratur tar la staziun ornitologica ed è responsabel en l'Engiadina, di envers il schurnal regiunal da SRF ch'intgins utschels dattan si schizunt per adina la plazza da cuar pervi dals disturbis.
Project da pilot en il Grischun
L'uniun svizra da parasguladers (SHV) haja percorsch il conflict tranter ils utschels ed ils sportists. Tenor l'incumbensada per l'ambient, Alexandra Schuler hajan els tschertgà il contact cun la staziun ornitologica per chattar ina soluziun. Pertutgadas da quest problem en il Grischun èn cunzunt las regiuns Surselva e Partenz.
Ensemen cun l'Uffizi da chatscha e pestga hajan las duas organisaziuns lantschà il project da pilot. Sch'in guardiaselvaschina vesa in utschè che cua en in territori, nua ch'i ha blers parasguladers, infurmescha quel l'uniun svizra da parasguladers e la staziun ornitologica.
Lura vegn definì in territori da protecziun en furma da cilinder e che na duai betg pli vegnir sgulà. Las scolas ed ils clubs da parasguladers infurmeschan lura ils pilots e las pilotas davart quests territoris.
Betg obligatoric
Er sch'il project n'è betg obligatoric, mussan blers pilots da parasguladers interess e chapientscha per il project. Sch'il project ha success, emprovan ins en l'avegnir forsa er en autras regiuns da la Svizra da realisar in tal model.