L'offerta da bikesharing «Mooinz» vegn engrondida – i dat da nov 20 enstagl 10 staziuns e novs cargobikes. Quest project vegn manà da l'uniun Pro Velo Grischun ensemen cun la fundaziun Feschtland. La finamira da questa fundaziun è d'integrar persunas cun in handicap u malsognas psichicas en il martgà da lavur.
Nus essan responsabels per las lavurs da reparatura, per quai che las batterias vegnan midadas, e nus essan responsabels per in «balancing» dals velos en la citad.
Il co-manader Orlando Hediger declera, che sia lavur haja lieu oravant tut davos las culissas. Ils lavurers midan las battarias e repartan ils velos en la citad. Quai saja ina lavur ideala per persunas cun in handicap, di el. Els sajan adina en tschertga da jobs ch'els pon far.
Cunquai ch'els avevan in lavuratori da velos è quai sa dà bain. In auter avantatg sajan ils daners ch'els survegnan per sia lavur – ils daners dal chantun na bastian betg, di Orlando Hediger. Perquai porti ad els bler d'avair quest job.
Il manader da project da «Mooinz» Simon Wahl da Pro Velo Grischun è da l'opiniun, ch'els hajan chattà il partenari ideal cun la fundaziun Feschtland.
Nus vulain absolutamain, ch'il «bikesharing» vegn a s'enragischar qua a Cuira.
El spera sin gronda acceptanza tras la collavuraziun cun Feschtland – ina fundaziun grischuna, che po persvader la populaziun grischuna da quest project. Pia ina collavuraziun ideala tranter Pro Velo Grischun e la fundaziun Feschtland – cun la medema finamira da promover la glieud da duvrar pli savens il velo.
