Il lockdown n'ha betg inspirà dapli auturas ed auturs rumantschs. 18 auturas ed auturs da tut ils idioms han inoltrà lur texts per il Premi Term Bel. Quai è il premi da litteratura, che vegn surdà mintg'onn durant ils dis da litteratura a Domat.
Tenor Nadina Derungs dal comité d'organisaziun na sajan quai betg dapli ch'auters onns. Betg sclerì per il mument saja, en tge furma ch'il premi vegnia surdà. E sche ils Dis da litteratura hajan lieu quest onn.
Quest onn avess lieu la 30avla ediziun dals Dis da litteratura. Quels valan sco pli impurtant inscunter da litteratura rumantscha. Il Premi Term Bel è dotà cun 3'000 francs.