Sin ils plazzals grischuns vegn lavurà mordio. Serrar plazzals saja la cumpetenza da la Confederaziun e betg dal chantun, di il minister d’economia Marcus Caduff.
Cun declerar la situaziun extraordinaria decida la Confederaziun, tge che resta avert e tge che vegn serrà. Ils chantuns èn da princip sa cunvegnids da sa tegnair vi da quai che la Confederaziun di. Betg che mintga chantun na giaja sia atgna via.
Uschè ditg sco la Confederaziun na serra betg ils plazzals sajan surtut ils impressaris responsabels. Els stoppian valitar da plazzal tar plazzal, sche las reglas d’igiena e las mesiras da prevenziun pervi dal coronavirus possian vegnir respectadas.
Esser al lieu per prender la decisiun
Dal medem avis è era Andreas Felix, manader da fatschenta da la Societad grischuna dals impressaris constructurs. Impressaris e patruns hajan d’evaluar la situaziun da plazzal tar plazzal.
Ulteriuras mesiras
Evitar infecziuns possian ins sin ils plazzals cun metter a disposiziun ulteriuras installaziuns sanitaras e meds da dischinfectar. Er il transport da lavurers e lavureras stoppia vegnir organisà uschia che las persunas hajan avunda distanza. Pausas communablas èn stritgadas.
Nagins plazzals serrads
Enfin uss tanschan questas mesiras, nagins plazzals n'èn vegnids serrads enfin ussa en il Grischun. Dentant accentuescha Andreas Felix, che blers plazzals en la periferia, en ils auts, n’èn gnanc anc averts. El spera ch’ils impressaris e patruns sa tegnian vid las perscripziuns da la Confederaziun.
In scumond da plazzals en l’entira Svizra fiss ina decisiun cun consequenzas gravantas. Ina decisiun che la Societad grischuna dals impressaris constructurs acceptass dentant senza commentari.