En il chantun Grischun datti 930 manaschis d'alp, pitschens e gronds. Blers han pudì meglierar bleras chaussas sco per exempel l'infrastructura. Era tenor il cussegliader d'alps dal Plantahof, Töni Gujan, èn ins bain vidlonder sin las alps grischunas. Las meglieraziuns ch'ins stoppia far sajan finessas.
Tut en tut è il chantun Grischun in chantun d'alpegiaziun agricula fitg ferm.
L'inscunter promova il barat d'infurmaziuns davart dal Plantahof, dal chantun ed era dals chaus d'alp. Ils ultims 40 onns è capità bler sin las alps, quai san era ils dus chaus d'alp Linard Ruffner da Bever e Martin Lutz da Mustér.
Ins sto guardar da mantegnair quests muvels ch'ins ha per l'alp per survegnir las contribuziuns. Quellas dovran ins lura era per pajar il pastur. Lezza paja è era in'autra ch'avant 20 u 30 onns.
Igl èn sa chapescha tut las premissas d'igiena ed urden, quai è tut vegnì mender, tut pli grev.
Il luf resta ina sfida
Era il luf ha procurà per discussiuns e dumondas. La coexistenza funcziunescha be per part. Il manar in'alp saja sa midà dapi la preschientscha dal luf, pasturas e pasturs discurrian d'in'autra alpegiaziun, di Töni Gujan ed agiuntescha che tuts sperian ussa sin las mesiras da regulaziun, che quellas gidian gia a partir da questa stagiun.
Experientschas cun chauns da protecziun en Slovachia
Ina sfida èn ils lufs era per puras, purs. pasturas e pasturs en Slovachia. La fin d'emna han ina biologa da selvaschina ed in pastur slovac raquintà al Plantahof co ch'els prender per mauns la problematica:
