Il plan da finanzas per ils onns 2025-2028 prevesa deficits per il chantun Grischun, il 2027 il pli aut cun bunamain 168 milliuns francs deficit. Raschun per las cifras cotschnas sajan custs che creschan en il sectur social e da sanadad, pli paucas entradas da taglia pervia dal sbassament dal pe da taglia chantunal e tut tenor pli paucs daners or da la gulivaziun da finanzas sco er pli paucs daners da la Banca naziunala svizra. Grazia a las reservas d'agen chapital possia il chantun far frunt a las sfidas finanzialas che spetgan, ha declerà il minister da finanzas Martin Bühler. Er la maioritad da la cumissiun responsabla sco er dal Cussegl grond è la finala suandada las propostas da la regenza. La fracziun socialdemocratica avess gugent schluccà la regla da pudair far dapli che 50 milliuns deficit grazia a l'agen chapital. Questa proposta n'ha dentant gì nagina schanza.
Transfurmaziun digitala ed in chantun attractiv e persistent
La gronda tractanda da la sessiun da favrer è il program da la regenza per ils onns 2025 – 2028. Quel definescha ils temas da pais, finamiras e mesiras politicas per ils proxims quatter onns per il Grischun. En tut èn quatter temas da pais definids:
- transfurmaziun digitala
- lavurar e viver en il Grischun
- clima ed ambient
- in Grischun attractiv
Sin basa da questas quatter pitgas ha la regenza definì 11 finamiras per il chantun Grischun, ch'il Cussegl grond ha tractà e pendì per enconuschientscha il mardi avantmezdi. Temas sco il spazi d'abitar, purschidas da scolaziun e furmaziun ma er la mobilitad han dà da discutar.
Discussiuns animadas davart il traffic public hai dà per raschuns actualas, suenter che la Viafier retica ha dà enconuschent ses plans da remplazzar colliaziuns da tren cun bus pervia da la mancanza da persunal. Cunzunt deputadas e deputads da la regiun Tavau e Filisur èn sa defendids, perquai ch'ils midaments da tren sin bus muntan pli lung temp da viadi per pendularias e pendularis . L'entira discussiun davart ils plans da la Retica vegn anc ad esser tema la mesemna en il Cussegl grond en il rom da l'ura da dumondas.
