- Il mainafatschenta sco er il president dal cussegl administrativ da las pendicularas d'Arosa eran la mesemna avant dretgira perquai ch'i hajan dà avantatgs a politichers e politicras.
- La sentenzia: La dretgira regiunala da Landquart ha declerà nunculpant las duas persunas da cader
- Las pendicularas d'Arosa han regalà pass da skis en valur da 550 francs a commembers d'autoritats e politichers.
Avant passa trais onns èsi vegnì enconuschent: Las pendicularas d'Arosa han pliras giadas regalà a politichers locals gratuitamain pass da skis che custan 550 francs. Perquai hai dà in'accusaziun cunter il mainafatschenta sco er il president dal cussegl administrativ.
La mesemna han ils dus commembers da cader stuì sa defender avant dretgira. I ha dà ina sentenzia senza chasti. Ils dus pertutgads n'hajan mai zuppà ch'els han purschì abunaments gratuits. Els n'hajan gnanc ponderà che quai pudess avair consequenzas giuridicas.
Tradiziun ed access per pudair far diversas lavurs
Tenor ils dus commembers da cader fetschian las pendicularas d'Arosa gia dapi var 50 onns talas regals a politichers e politicras. Quai saja ina tradiziun ch'ins haja surprendì, han els argumentà avant dretgira. Ils dus umens hajan schizunt vesì talas offertas sco part da lur obligaziun.
Vinavant han ils dus umens argumentà, ch'i saja per part era stà necessari da regalar gratuitamain pass da skis a commembers da las autoritads. Els hajan per exempel era regalà pass gratuits a polizists sco era a responsabels da l'uffizi da construcziun e da l'uffizi forestal. Tar quellas persunas saja impurtant ch'ellas hajan access al territori da skis, per exempel en cas d'accidents u da controllas da guaud. Uschia han ils dus umens argumentà avant dretgira.
In avantatg per las pendicularas d'Arosa n'haja mai existì pervia da tals regals. Quai è era la conclusiun da la dretgira regiunala da Landquart. Perquai ha ella declarà nunculpant ils dus umens. Abunaments gratuits per politichers e politicras datti nagins pli da las pendicularas d'Arosa pervia dal squitsch public.
Dretgira da Cuira na fiss betg stada neutrala
Oriundamain era planisà da tractar il cas a Cuira. La dretgira regiunala da Plessur ha dentant desistì dal cas pervi da problems d'esser neutrals. In dals derschaders fa numnadamain part da la suprastanza communala d'Arosa. El haja era survegnì in da quels pass gratuits. Perquai ha la dretgira chantunala decidì ch'il cas vegn tractà a Landquart.