La partida populara dal Grischun di cleramain NA a la lescha da Covid-19. Sco quai ch'il president da la partida Roman Hug ha ditg envers RTR saja la parola crudada suenter lunga e viva discussiun a chaschun da la radunanza da delegads virtuala.
La partida mamma, la PPS Svizra , ha decidì da dar liber la vusch per la lescha da Covid-19 che vegn votada dal suveran ils 13 da zercladur.
Pervia da la massa fatschentas ha la PPS dal Grischun decis sias parolas en duas etappas: Gia la fin d'avrigl han delegadas e delegads decis da refusar la lescha da CO2 e las duas iniziativas agraras. Quai correspunda a la tenuta da la partida mamma.
Per grischunas e grischuns propona la PPS grischuna d'acceptar il nov sistem d'eleger - ina da las trais votaziuns chantunalas dals 13 da zercladur 2021. Questa dumonda n'è insumma betg stada dispitaivla: La decisiun è stada unanima.
Sin in clic tut las fatschentas federalas, chantunalas e communalas: rtr.ch/votaziuns