La notg sin il prim da schaner è in luf collidà cun in tren da manaivel da Panaduz. L'animal feminin è crappà. Tenor l'Uffizi da chatscha saja la collisiun vegnida annunziada immediatamain. Ins na sappia anc betg, danunder ch'il luf derivia. Il cadaver vegn surdà a l'institut da patologia da l'universitad da Berna per ulteriuras controllas.
Nagin cas singul
Che lufs daventan l'unfrenda d'accidents da traffic n'è betg pli in eveniment singular. L'onn passà èn sis lufs crappads en il Grischun sin questa moda. Pir l'ultima emna da l'onn 2019 hai dà aifer intgins paucs dis duas collisiuns cun lufs en Surselva (Tavanasa e Tumein).
Triep da lufs creschan
En Svizra crescha a moda rasanta la populaziun da lufs. Tenor la pli nova evaluaziun da la Gruppa Luf Svizra datti en l'onn biologic (quel dura anc fin la fin da l'avrigl) almain set trieps confermads. In onn avant era quai anc quatter.
Ord quai resulta in effectiv da lufs da 60 fin 70 animals, scriva la Gruppa Luf Svizra sin sia pagina d'internet.
RTR novitads 09:00
