Oriundamain eri quintà che la partiziun da ginecologia da Walenstadt serra pir il 2027. Dentant lura èsi tuttenina ì spert e la partiziun ha gia serrà il favrer passà. Dapi il mars vegnan pia dapli dunnas da Son Gagl a parturir lur pops en l'ospital chantunal en la clinica da dunnas Fontana a Cuira. Uss, bun mez onn pli tard constatescha Peter Martin Fehr, il manader dal Fontana e schefmedi, bun 15% dapli naschientschas.
Preparads bain per l'augment
Quest augment na saja dentant stà nagin problem. Ins haja gia l'onn passà renovà l'infrastructura ed haja entras quai er avunda plaz e salas da parturir fitg modernas. Sper quai hajan ins er augmentà il persunal per er vinavant pudair porscher la tgira in tar in – n'emporta betg sch'ils novnaschids vegnan da Son Gagl u dal Grischun.