Organisaturas ed organisaturs èn bain leds ch'i dat tut tenor puspè dapli pussaivladads la stad per occurenzas grondas. Uschia spera p. ex. ils organisturs dal «Städtlifest» a Glion ch'els possian manar atras la festa che carmala en dus dis 10'000 persunas. Quai che fa dentant mal il venter èn las prescripziuns puncto segirtad. Controllar che las persunas sajan vaccinadas, testadas negativ u infectadas e guaridas, saja ina gronda sfida. Quai conferma er la presidenta dal comité d'organisaziun da l'openair Stussavgia. Els stoppian anc ponderar sch'in festival saja pussaivel sut questas circumstanzas. Malgrà ch'i fiss pussaivel restan ils organisaturs da RockSedrun dentant tar lur decisiun da spustar l'event da circa 500 persunas sin la proxima stad, il 2022.
Sper quai restian er anc autras malsegirezzas: Tge è propi prescrit, co èn occurenzas pussaivlas? Blers decidan perquai pir la fin da matg cura ch'il Cussegl federal preschenta il plan concret, sche l'event ha lieu.
HCD optimistic per la nova stagiun
Il club da hockey da Tavau è il sulet club da sport grischun che po beneventar en temps normals plirs millis aspectaturs als gieus da chasa. Tenor Marc Gianola, CEO dal HCD, dat la decisiun dal Cussegl federal segirtad. Fin 10'000 aspectaturs tunia bain. I possia dentant anc capitar bler enfin il settember, precisescha el. Il settember è il mains cura che la nova stagiun da hockey cumenza. Sche tut va tenor plan è el optimistic ch'els possian beneventar 4'500 aspectaturs. El quintia numnadamain betg ch'i saja lubì il settember da laschar vegnir fans en ils plazs da star en pe en il stadion.
Igl è bel da vesair la via co ch'i pudess guardar ora il cumenzament da la proxima stagiun.
Tenor Marc Gianola èsi impurtant da vinavant restar flexibel. Durant questa pandemia saja da guardar emna per emna.
Avair in bun nas è impurtant
Il comite d'organisaziun dal maraton da mountainbike engiadinais quinta gia dapi mais che els possian manar atras la cursa ils 28 d'avust. Els hajan davent dal cumenzament planisà cun maximal 1'500 persunas. Las ultimas decisiuns dal Cussegl federal dettian segirtad, declera il president da la cursa, Claudio Duschletta.
L'unica malsegirtad che regia anc enturn la cursa, saja quella dal traject. Planisà saja ina cursa che maina en l'Italia. Per che gliez saja pussaivel, stuess dentant er l'Italia dar la lubientscha da menar atras occurrenzas cun pliras milli persunas.
Per il cas che nus na pudain betg ir en l'Italia datti ina cursa alternativa.