Octopus per uffants prematurs - L'emprim cumpogn en l'ospital

Mintgamai la mesemna saira s'entaupan las dunnas da l'uniun da dunnas «Vinavon» da Sumvitg e fan cun crutsch octopus per uffants prematurs.

1 / 3

2 / 3

3 / 3

Mintgina ha prendì cun sai in agen crutsch e fil en tuttas colurs e cuntinuescha gist là, nua ch’ella è stada airi la davosa giada. En la stiva vegn baterlà, fatg sgnoccas e dumandà suenter, co ins faschess il meglier quest'anza.

Las dunnas giaudan il temp ensemen. Far in octopus en cumpagnia saja bel. Ins po passentar temp ensemen ed en il medem mument anc far insatge bun. In aspect positiv che vegn anc vitiers, sch'ins ha ina dumonda durant far l'octopus, sa insatge da l'uniun segir gidar vinavant.

Sch'ins haja ina dumonda, pon ins dumandar la gruppa ed insatgi sa lura segir gidar.

Per ch'igl è segir ed ils uffants na survegnan nagins problems, sto mintgin e mintgina che fa cun crutsch, sa tegnair a las directivas ch'èn publitgadas sin la pagina d'internet da «Oktopus für Frühchen Schweiz». Uschia ston era las dunnas da l'uniun «Vinavon» sa tegnair a directivas exactas.

Avant ch’ils octopus van en ils ospitals svizzers, vegnan els mintgamai controlladas da l’uniun tetgala «Oktopus für Frühchen Schweiz».

Tras quella è era l’inizianta vegnida attenta sin il project. Ella haja vis in «post» sin Facebook che l'uniun tetgala ha tschertgà glieud che fa octopus per ils uffants. Suenter haja ella purtà l'idea da far ils octopus en la radunanza da l'uniun ed ins haja decis ch'ins sa participeschia a quel project. Il dumber da las participantas saja tranter 6 e 15.

Fin ussa han las dunnas fatg cun crutsch dapli che 150 octopus. Per in octopus han las dunnas rutinadas circa tschintg uras.

In sguard enavos

L'idea da far octopus per uffants prematurs aveva ina dunna dal Danemarc. Ses uffant è naschì prematuramain e per ch'el na tiria betg als cabels ha la mamma fatg cun crutsch in octopus. Quel ha ella mes en l'incubatur (Brutkasten) e l'uffant ha sa quietà. I para ch'ils tentaculs dal octopus hajan imità la corda da l'umbli. Questa acziun ha sa derasà en l'entira Europa ed è perfin er arrivada a Sumvitg.