Il chantun vul promover la biodiversitad en ils guauds ed ha sviluppà ina nova strategia «Biodiversitad forestala en il Grischun 2035». Tenor communicaziun da la regenza survegn el per quest intent ils onns 2020 fin 2024 la summa da 12,7 milliuns francs da la Confederaziun.
Quest import vegn cumplettà cun contribuziuns chantunalas e pajà a proprietaris da guaud per realisar las mesiras, sco per exempel augmentar la valur dals spazis da viver u installar reservats da guaud. 30% dals custs ston ils proprietaris da guaud pajar sezs.
Mantegnair e promover finamiras
Il guaud cuvra in terz da la surfatscha dal chantun Grischun e porscha spazi da viver a bleras spezias d'animals e da plantas. Circa 40% da tut las spezias en Svizra vivan en il guaud u dal guaud. Cun la nova strategia Biodiversitad forestala en il Grischun 2035 vul ins mantegnair e promover cun finamiras concretas la biodiversitad en il guaud durant var 15 onns.