Ils iniziants da la roda da vent a Haldenstein, Jürg Michel e Josias Gasser, planiseschan 700 meters sper la roda ch'i dat gia ina segunda. La Staziun ornitologica svizra da Sempach sa dosta dentant cunter questa segunda roda da vent, per proteger ils pivs che vivan en ils guauds dasperas. In pèrin da pivs saja be 300 meters sper la roda planisada vi da cuar, ha declerà Livio Rey da la fundaziun envers il schurnal regiunal da SRF.
Questa distanza pitschna munta in grond privel da collisiun tranter ils pivs ed ils propellers da la roda da vent.
Sistem duai arretar la roda sch'ils utschels èn en privel
Josias Gasser fa dentant attent, ch'els vulessan installar ina tecnica che duai percorscher utschels en il conturn e lura tenor basegn tschentar giu ils propellers da la roda. Era Livio Frey enconuscha quest sistem, dentant na saja betg cumprovà che quai funcziuneschia propi sco previs.
Sch'ils iniziants pon en l'avegnir producir cun ina nova roda da vent en la Val dal Rain da Cuira electricitad per bun 2'000 chasadas, è anc intschert. Tenor l'iniziant Josias Gasser sajan els schon pli ditg en contact cun ils ornitologs e sperian perquai da chattar bainbaud ina schliaziun.
