Passa in milliun pignols da Nadal vegnan vendids mintg’onn en Svizra. Prest 60% da quels vegnan da l'exteriur. Elavurar e transportar quels ina giada tras l’entira Europa enfin ch’els arrivan en Svizra producescha bler CO2.
In pignol ord la regiun
Per far in pass envers in Nadal pli persistent cusseglia Urban Maissen, il selvicultur chantunal e manader da l’Uffizi chantunal per guaud e privels da natira, da sa decider per in pignol ord la regiun. En il guauds grischuns – per exempel il guaud d’ognas – dettia avunda pignols che sajan adattads per la stiva. Era las singulas plantinas tar ils prads che disturbian be l’agricultura sajan adattadas per la stiva. Ina pussaivladad fiss da plazzar sez in pignol en ina cria. Durant l’onn possian ins laschar quel en curtin ed durant Nadal vegn el en stiva. Per tgi che n'haja betg in curtin dettia era pussaivladads da prender a tschains in e returnar quel suenter l’act festiv.
Tips per la saira da Nadal
Sper il pignol datti diversas chaussas ch’ins po adattar per in Nadal pli persistent. Per exempel tar la decoraziun. Enstagl da cullas da plastic pon ins decorar il pignol cun stailas fatgas ord strom. Enstagl palpiri colurà e plain chemia pon ins duvrar gasettas veglias per pachetar en il regal.
Apropos pignol...
-
Bild 1 von 2Legenda: Era in pignol betg uschè bel po embellir la stiva per la festa da Nadal... Marcel Sgier -
Bild 2 von 2Legenda: Il pignol in pau pli spezial da Marcel Sgier d'Andiast. Marcel Sgier