L'exposiziun è vegnida realisada da 12 posts spezialisads e museums tranter Constanza e Cuira. Cuira tutgava numnadamain tar ina cuminanza da lieus e citads ch'ha organisà il commerzi sur las alps. Ensemen èn els stads in spazi economic, e quel vegn mussà en questa exposiziun ambulanta.
Cuira ha survegnì in ferm impuls cura ch'il commerzi sur las alps è vegnì pli intensiv. Fin il 13avel u 14avel tschientaner hai mo dà commerzi cun bains da luxus. Lura han ins dentant cumenzà a commerziar rauba da parts dal mund lunsch davent: A l'Europa dal Nord, l'Europa Centrala e da l’Ost, dal territori da la Mar Mediterrana e da l'Extrem Orient.
Il traffic sur las Alps è sa midà
Durant quel temp èn er autras chaussas sa midadas: munaida d'aur ed argient è vegnida adina pli impurtanta, ins scriveva dapli brevs ed il sistem da contabilitad è vegnì pli cumplitgà. Tenor las expertas ed ils experts ha la regiun profità dal fatg ch'i n'ha betg dà grondas guerras durant il temp ed er d'ina fasa climatica chauda. Uschia èsi stà pussaivel da producir vestgadira da glin en la regiun dal Lai da Constanza. Quella è lura vegnida exportada fin en la China, la Crimea e la Siria.
Novs objects dal Sennhof
Per l'exposiziun han ils expositurs rimnà passà 150 objects, chats e funtaunas scrittas. Er novs objects ch'ins ha chattà sut l'anteriura praschun Sennhof a Cuira vegnan exponids. Els mussan tge che las mastergnantas ed ils mastergnants han piglià a maun durant l'11avel tschientaner. Per exempel han els fabritgà artitgels religius per la curt episcopala da Cuira.