Morsas da chauns - Tge che l'augment da chauns munta per las cifras da morsas

I ston esser stadas scenas dramaticas dacurt en ina vischnanca turitgaisa. Avant ina chasa da pliras famiglias ha in «Rottweiler» attatgà dus uffants che faschevan termagls ad Adlikon. Omadus èn vegnids blessads, in grevamain. Era creschids che han vulì gidar èn vegnids attatgads. L’animal era mitschà or d’ina abitaziun. Ils possessurs, in pèr en la vegliadetgna da renta, avevan pir paucs dis avant cumprà il chaun. Sin ordinaziun da l’uffizi veterinar è quel vegnì durmentà.

Quest incident ha manà l'attenziun sin in svilup che s'accentuescha dapi intgins onns, cunzunt dapi la pandemia.

Adina dapli cas da morsas da carstgauns

Ina dumonda dal «Tages-Anzeiger» tar ils uffizis veterinars da sis chantuns da la Svizra tudestga conferma il trend. Quasi tuts registreschan onn per onn dapli annunzias pervi d'attatgas da morsas u auters incaps cun chauns.

La situaziun en il Grischun è pli stabila.

Regiuns urbanas èn pertutgadas pli ferm da morsas da chauns

Da tge dependa quai? Per l'ina è il quint simpel: dapli chauns muntan era dapli problems cun chauns. Dapi onns crescha la populaziun da chauns. Surtut durant la pandemia han bleras Svizras e blers Svizzers tuttenina survegnì gust da cumprar in chaun: ins era gea en homeoffice, gieva savens a spass en l'aria frestga e giavischava in pau cumpagnia.

Incidents cun chauns

Veterinaris, medias, persunas responsablas per chasas d'animals, instructurs da chauns, la polizia sco er organs da duana èn obligads tras la lescha d'annunziar al post chantunal cumpetent incidents, nua ch'in chaun ha blessà umans u animals u nua ch' el ha mussà in cumportament agressiv. Il chantun po extender l'obligaziun d' annunzia sin ulteriurs circuls da persunas.

Sch'ina annunzia vegn fatga, controllescha l'uffizi chantunal per la segirezza da victualias e per la sanadad ils fatgs da l'annunzia. Sin basa dal resultat da l'examinaziun respectivamain dals scleriments ch'èn vegnids fatgs, po el ordinar eventualas mesiras dal dretg administrativ e dal dretg da custs. Quellas includan per exempel l'obligaziun da la possessura u dal possessur dal chaun d'absolver in trenament per il chaun, l'obligaziun da tegnair il chaun vid la tschinta u d'al metter si in buccarè. En ils menders cas po era l'expropriaziun dal chaun vegnir ordinada.