La producziun da vestgadira chaschuna dapli emissiuns da CO2 che l'entir traffic mundial e las bartgas quintà ensemen. Da quel fatg è la glieud adina pli pertscherta. Ma cumprar vestgadira persistenta che na duai betg far donn a l'ambient custa ses pretsch.
Uschia era la vestgadira dal outdoor-label grischun «Rotauf». Cunquai ch'il credo dal label, ch'è vegnì fundà il 2011, è da producir products senza tissi – persuenter cun materials sco launa da nursas da Mustér – custan ses products era dapli che autras marcas dad outdoor. Tenor il cofundatur da «Rotauf» Curdegn Bandli s'accorschian els che la glieud saja oz pli pertscherta da la problematica e plitost pronta da dar ora dapli raps per products persistents.
Il cofundatur da Muntagnard, Dario Grünenfelder, conferma il fatg che la glieud saja pli pertscherta da la problematica da l'industria textila. Tuttina dettia ina discrepanza tranter quella savida e la prontadad da pajar dapli per in product persistent. Surtut sch'i va per moda. Moda saja in tema bler memia emoziunal e persunal per pudair persvader sulettamain cun l'aspect da la persistenza. Il product sco tal sto persvader la clientella.
E perquai ch'il label, ch'è vegnì fundà il 2020, vegn mintgatant als cunfins sch'i va per cumbinar qualitad, stil, confort e persistenza stoppian els era savens sezs sviluppar ils materials per lur vestgadira.
Or da l'archiv:
Scienza svizra per la moda
En general pretendi ina massa spiert innovativ sch'ins vul producir moda persistenta. Quai s'accorschia era Rotauf, che lavura actualmain ensemen cun la ETH vi dad in material per giaccas da plievgia betg toxicas, ch'els pon lura producir en Svizra.
Omadus labels èn vinavant da l'avis ch'ils labels da moda ston era surpigliar responsabladad per lur vestgadira suenter ch'ella è vegnida duvrada. Uschia offreschan tuts dus in service da reciclar lur products. Plinavant s'emprova Muntagnard actualmain vi dad in model d'abunament nua ch'ins prenda a fit in t-shirt e paja mintga mais pli e pli pauc per l'utilisaziun. Quai duaja motivar da purtar il t-shirt uschè savens sco pussaivel.
I drovia bler idealissem, perseveranza ed innovaziun per manar in label da moda persistent – ed i saja tut auter che simpel. I daventia dentant adina pli simpel – cunquai che moda persistenta saja adina pli dumandada.
Ma era sch'i dettia bleras sfidas sch'ins vul manar in label da moda persistent saja quai la suletta raschun d'exister per omadus labels. Sco ch'els din: «Sche nus faschain il medem sco tut ils auters na drovi nus betg».
