Pervia da la primavaira plitost bletscha cun temparaturas bassas haja la vegetaziun circa duas emnas retard, constatescha Batist Spinatsch, manader da cussegliaziun tar il Plantahof. A quella conclusiun vegn el entras plirs resuns ch’el haja survegnì da puras e purs ord las regiuns Tumleastga, Grischun Central sco era parts da l’Engadina e la Surselva. En il Segneradi saja il pastg creschì meglier ma tuttina impedeschia il bletsch actualmain per part la racolta.
Damain qualitad, dapli quantitad
Entras las temperaturas bassas na sajan las spias pli finas betg sa sviluppadas bain. Uschia ch’i dettia plitost pastg grop. La quantitad saja perencunter bun, uschia ch’ils donns sajan survesaivels, di Batist Spinatsch. Ils purs favuriseschian plitost ina tala aura che ina setgira sco i ha dà l'onn passà.