La suprastanza communala da Malans planisescha ina nova via da velos da Malans a Landquart. Quai cun colliaziun a la ruta svelta per velos en direcziun dal Partenz, Cuira e Sargans. En quest connex è vegnì elavurà in project. La radunanza communala da Malans ha discuttà il project mesemna saira. La vischnanca ha infurmà via communicaziun.
Il project cumpiglia:
- Ina nova via da velos cun punt sur la Landquart.
- Reorganisaziun dal traffic en la regiun Karlihof cun fermadas da bus adattadas per persunas cun impediments
- Colliaziuns e passadis segirs per peduns e pedunas
Ils custs per il project muntan a 3 milliuns francs. Da quels surpiglian 2,5 milliuns francs la Confederaziun (program per aglomeraziuns), il chantun e terzs. Pervia dals auts custs ha la radunanza communala predeliberà la fatschenta per mauns da la votaziun a l'urna. Critica hai cunzunt dà perquai che la nova via da velos è planisada via ina via da funs e betg pli per lung dal stradun. La radunanza communala ha la finala decis da recumandar al suveran da refusar il credit d'obligaziun da 3 milliuns francs. Il suveran decida ils 9 da zercladur 2024 en chaussa.
Ultra da quai ha la radunanza communala da Malans decis:
- In scumond da fieus artificials che fan canera.
- In credit supplementar da 50'000 francs en connex cun la fermada da bus Postplatz.
- In credit d'obligaziun da 90'000 francs per sanar la plazza da giugar tar la chasa da scola Eschergut