Fin uss devi mo en las autras linguas naziunalas purschidas per auturs ed auturas d'approfundar l'art da scriver texts litterars. A partir dal 2025 duai da nov er esser pussaivel per scrivents e scriventas rumantschas da sa participar ad in lavuratori per perfecziunar il scriver da texts litterars per rumantsch. L'idea per quest nov lavuratori vegn da Gianna Olinda Cadonau e Flurina Badel.
Cler èsi in experiment. Ma igl è impurtant che auturas ed auturs han la pussaivladad d'experimentar e da tschiffar novs inputs.
La purschida sa drizza tenor la Lia Rumantscha a persunas da tuttas vegliadetgnas e tuts idioms – independent da lur experientschas da scriver texts litterars.
Il lavuratori cuzza en tut quatter semesters e cumenza il schaner 2025. Questa purschida da la Lia Rumantscha vegn sustenida finanzialmain e concepziunalmain da la Fundaziun svizra per la cultura Pro Helvetia. S'annunziar per l'emprima ediziun pon ins a partir dal 1. settember 2024.
S'approfundar en il mund da litteratura rumantscha
Planisads per il luvratori èn tenor la commuicaziun tschintg moduls tematics che dattan ina survista dal canon litterar rumantsch e sa concentreschan sin il mastergn dal scriver. Suenter questa part tematica sa deditgeschan ils participants e las participantas a lur agens projects litterars – quai cun sustegn da la gruppa e da menturas u menturs.