La relaziun dal sculptur Benno Willi e la sculptura dal Sontg Nepomuk da Domat ha cuzzà dapli che enquala lètg. L'emprima giada ha il sculptur sa fatschentà avant passa 40 onns cun Nepomuk. Sco giuvenot suenter l'emprendissadi aveva el fatg ina copia da la testa per l'original or da crap da sablun. Il 2007 è quel lura vegnì remplazzà dad ina copia creada da Benno Willi. L'original stat saun e salv en l'entrada da la chasa da scola Tircal a Domat. La copia ha dentant gì in trist destin. Ina damaun l'entschatta dal 2017 era in automobilist collidà frontalmain cun la statua da dus meters autezza ed ina paisa da 1,6 tonnas. Cuntrari a l'automobilist ch'è mitschà senza blessuras ha Nepomuk gì in donn total. Uschia è el turnà puspè en l’atelier da Benno Willi. Cun blera pazienza e durant tschients dad uras da lavur ha il sculptur lavurà vi da la copia da la copia.
Uss ha la statua dal sontg Nepomuk finalmain bandunà l'atelier che Benno Willi maina en terza generaziun. Rentà cun tschintas e pulstrà cun dus plimatschs è Nepomuk vegnì transportà e tschentà sin il sochel sper la via principala.
Jau sun fitg led ch'el è or dals pes e ch'el è là al lieu. Speranza ch'el resta là nua ch'el è ussa.
Benno Willi di ch'el possia, ussa che Nepomuk haja definitivamain bandunà ses atelier, er puspè durmir stagn e bain. Enavos en l'atelier resta la statua collada ch'era il model per la copia da la copia.
Per Benno Willi è la «causa Nepomuk» uss definitivamain mess ad acta. La statua collada tutga a la vischnanca da Domat, el na sappia betg tge che capitia cun quella. Ma per Benno Willi è cler: Il Nepomuk collà ch'è restà enavos en ses atelier sto definitivamain davent.
Or da l'archiv
