La Polizia chantunala ha pudì sclerir ina seria d'infracziuns en las regiuns Surselva e Viamala dal november 2022. In um da la Rumenia da 50 onns ha concedì, d’esser rut en 24 giadas en chasas da vacanzas e chasas d’ina famiglia. Vitiers vegnan quatter ulteriuras infracziuns en auters chantuns.
L’um haja engulà en tut rauba en la valita da radund 50’000 francs, sco la polizia communitgescha. Il donn material vid las chasas saja anc pli aut. Il delinquent ch'era en Svizra malgrà in scumond d'entrar, sto uss sa responsar davant la giustia grischuna.
