Durant 10 dis datti mintga di ina producziun. D'udir èn grondas ovras da Beethoven, Tschaikowsky u er da Mozart. In dals accents furman quest onn las ovras sinfonicas dal temp da la romantica, per exempel la sinfonia «Aus der Neuen Welt» da Dvořák. D'avair in program pulpì d'in hit suenter l'auter saja strategia, declera la manadra da fatschenta dal festival, Franziska von Arb. Lur devisa saja da festivar capodovras.
Nus avain la visiun che Claustra davent'ina destinaziun da cultura dumandada durant la stad.
En general sa drizzia il program ad amaturs ed amaturas da musica classica. Cun l'ultim concert emprovan ils organisaturs da cuntanscher in public pli vast, per l'ina pli giuven, per l'autra il public indigen. Lura datti d'udir musica da films premiads cun in Oscar e da vesair sequenzas da film.
Stars internaziunals sin tribuna
Er tge che pertutga interprets na sto il festival a Claustra betg sa zuppar da la concurrenza. La Deutsche Kammerphilharmonie Bremen – ch'è il mument in dals megliers orchesters sin palancà internaziunal – vegn per exempel a Claustra. Lura sa preschentan era Thomas Hampson – in dals pli renumads baritons dal temp d'oz – u il pianist András Schiff. Tar ils interprets da renum pli giuvens dumbra p. ex. il pianist Jan Lisiecki.
Interprets u interpretas indigenas tschertgan ins adumbatten sin la glista da program. Da promover tals e talas da la regiun na tutgia betg tar lur prioritads, di Franziska von Arb.
Quasi vendì ora
La prevendita giaja per il mument fitg bain. Gia ina buna part dals concerts è quasi vendida ora in mais avant las producziuns. Sur 10 dis vegnan 4'000 fin 5'000 persunas a visitar ils concerts. Uschia quintan ils organisaturs da pudair nudar in augment da 10% da giasts, en congual cun l'onn passà. La gronda part da la clientella vegnia da la Svizra orientala – ina pli pitschna part derivia d'ordaifer la Svizra.
Era la regiun profitescha da l'occurrenza che carmala tanta glieud a Claustra. Tge che pertutga l'effect economic sin la regiun pon però ni ils organisaturs dal festival ni la destinaziun turistica dir cifras concretas.