La scolasta da cuser pensiunada Judith Cantieni è in carstgaun da moviment e va mintga di giuadora. Suenter ch’ella aveva gia fatg tschertas excursiuns da plirs dis a pe, ha ella survegnì gust da partir per ina tura pli lunga. La via da son Giachen sa è offrida per quai, pervia ch'ella è marcada bain e porscha bleras pussaivladads da pernottar.
L'avrigl passà ha la Turitgaisa, che viva gia daditg en il Grischun e discurra perquai er in pau rumantsch, pachetà ses satgados ed ha cumenzà sia via da pelegrinadi a Constanza. Quai è in lieu popular da partenza per la senda da pelegrins, e da là èsi lura ì travers tras la Svizra fin a Genevra. Pir cur che questa etappa era gartegiada senza problems e pli spert che spetgà, èsi stà cler per Judith Cantieni, ch'ella vegnia a far l'entira via fin a Santiago de Compostela en Spagna.
Bler n’ha la dunna che viva a Tusaun betg planisà ordavant, sur notg ha ella il solit durmì en chombras da plirs letgs, uschenumnads «albierts da pelegrins», che sa chattan en la vischinanza da la senda. Igl ha era dà avunda ustarias e butias per mangiativas sper via, uschia ch'er l’alimentaziun n’è mai stada in problem.
Cunzunt la natira m’ha impressiunà.
Cunquai che la via da son Giachen è fitg enconuschenta, ha ella gì sin ses viadi da bun trais mais tras la Svizra, la Frantscha e la Spagna inscunters cun auters pelegrins or da l'entir mund. Spezialmain questas entupadas èn stadas per ella ina fitg bella experientscha.
La gronda part da la glieud n’è betg disada da chaminar mintga di lungas distanzas a pe ed anc da purtar in satgados, pervia da quai po quella via per blers pelegrins daventar ina sfida corporala u schizunt chaschunar blessuras. Judith Cantieni ha perquai guardà da far durant ses viadi mintga di gimnastica sper il chaminar, ed era da prender cun sai mo las chaussas pli impurtantas per tegnair ses satgados uschè lev sco pussaivel.
Grazia a questas preparativas ha ella pudì ir la via senza suffrientschas corporalas. Schizunt cun vaschias vi dals pes – il forsa pli derasà mal dals pelegrins – n'ha Judtih Cantieni gì da far nagut. Cun il temp ha ella uschia pudì ir fin a 30 kilometers per di.
Ina sfida percunter saja stada da betg ir a perder sin via, era sche quella è per gronda part marcada bain. Judith Cantieni saja stada savens uschè profundada en ses patratgs, ch’ella haja mintgatant simplamain survesì las marcaziuns da la via. Ma grazia a l’agid dad indigens, auters pelegrins e las cartas geograficas en ses guid da viadi, ha ella adina puspè chattà enavos sin la dretga via.
Uschia ha ella cuntanschì l'entschatta da fanadur 2023 Santiago de Compostela. Cun quai s'haja accumplì in siemi per ella, ed igl haja fatg bain dad appreziar l'agen success.
Per turnar a chasa ha ella sa prendì bler temp per pudair sa disar plaunsieu vi dal mintgadi usità. Durant ses viadi n'ha ella manchentà nagut, ella ha giudì mintga di ch'ella ha pudì far precis quai ch'ella vuleva gugent. Per sasezza prenda la mamma da trais uffants e tatta da quatter biadis cunzunt cun, quant impurtant ch'igl è dad era guardar sin ils agens basegns. Quai realisescha ella uss en ses mintgadi e pensa adina puspè cun grond plaschair enavos vi da ses temp sco pelegrina.
