Ils represchentants da la regiun Moesa pretendan da la regenza grischuna dapli sustegn. La regiun Moesa saja en ina sumeglianta situaziun sco il Tessin e dovria perquai era mesiras sumegliantas sco il Tessin.
Ils cussegliers guvernativs Marcus Caduff e Peter Peyer han chapientscha per ils quitads ed ils pensiers da la regiun. I saja ina situaziun speziala, tuttina saja dentant da suandar las prescripziuns da la Confederaziun.
14 deputadas, deputads e presidents communals da la regiun Moesa èn sa scuntrads a San Bernardin cun ils cussegliers guvernativs Peter Peyer e Marcus Caduff sco er cun il schef dal Stab directiv chantunal Martin Bühler per in barat cuminaivel. Ils represchentants dal chantun han suttastritgà l'impurtanza d'ina gestiun centrala da las mesiras cunter il coronavirus tras la Confederaziun. Quella aveva declerà cler e net che mesiras chantunalas che cuntrafetschian a las disposiziuns valaivlas da la Confederaziun, na sajan betg pussaivlas.
La delegaziun sa renda perquai il mardi a Puntraschigna, nua ch'ella sa scuntra cun represchentantas e represchentants da l'Engiadina e da las autras vals dal sid. A la fin da la scuntrada han las represchentantas ed ils represchentants da la Moesa suttastritgà lur confidenza en la Regenza e las numerusas posiziuns cuminaivlas. Ins spetgia ussa ch'il Cussegl federal anticipeschia la situaziun futura e na reageschia betg cun retard.
