Oriundamain ha il chantun vulì vender il bajetg nua ch'il Departament d'educaziun, cultura e protecziun da l'ambient ha ses biros. El ha insacura dentant midà strategia – e cunquai ch'igl è lura stà cler ch'il bajetg resta anc pli ditg en possess dal chantun – hai pretendì lavurs en connex cun la protecziun cunter incendis.
Il chantun ha là gia gì enconuschientscha dal fatg ch'igl ha asbest en il bajetg dal EKUD. Quel asbest n'è dentant betg privlus – uschè ditg ch'el è lià. Sch'ins fa dentant lavurs vi d'elements che cuntegnan asbest e deliberescha uschia las fibras d'asbest – lura vegni privlus. Ed exact quai è capità durant quellas lavurs da protecziun cunter incendis, ch'ins avess atgnamain era pudì far senza deliberar fibras d'asbest. I saja dentant capità in sbagl d'infurmaziun e perquai haja in lavurant resgià en in element da plafond ch'ha cuntegnì asbest.
Sinquai han tut ils collavuraturs e collavuraturas dal EKUD stuì ir a chasa e lavurar en il homeoffice. En quel temp è la stanza vegnida nettegiada ed il tagl en il plafond è vegnì sigillà. Suenter che las mesiraziuns da substanzas toxicas èn stadas bunas han ils collavuraturs e las collavuraturas puspè pudì turnar en biro. Quai dentant mo per in pèr mais. Il chantun ha suenter quest incap numnadamain decidì da prender per mauns la sanaziun d'asbest da l'entir bajetg – che fiss atgnamain stada planisada da far pir en in pèr onns – gia il zercladur da quest onn.
La sanaziun d'asbest è vegnida fatga dad experts ch'èn spezialisads per talas lavurs. Els van da stanza tar stanza, isoleschan quellas ed elimineschan lura las substanzas toxicas. E cunquai ch'il bajetg è uschia gia stà in grond plazzal – ha il chantun nizzegià la chaschun ed ha suenter la sanaziun d'asbest gist anc fatg lavurs da modernisaziun.
Tut quellas lavurs han chaschunà custs da 1,8 milliuns francs. Avant Nadal ston las lavurs esser a fin – uschia ch'ils collavuraturs e las collavuraturas dal EKUD pon en il decurs dal schaner puspè turnar da lur biros provisorics, ch'èn stads en anteriurs biros da l'Uffizi da construcziun bassa.
