In di cun il spazzachamin - Da viadi cun il barschun empè dal microfon

Sco quai che Flurin Candinas di, na saja la lavur da spazzachamin betg stada da l’entschatta davent ina professiun da siemi: «Sco ch’igl è, cun 14 onns hai jau empruvà ora in pau dal tut, e tar mes anteriur schef hai jau lura pudì far in fufragnadi. Quel ha ditg la fin dal fufragnadi ch'chau possia vegnir sch'jau vi, ed uschia èsi atgnamain stà fatg, e dapi lura sun jau spazzachamin.»

Mo dus emprendists pli en il Grischun

Accumpagnà vegn Flurin Candinas da Damian Hunger che frequenta ses terz e davos onn d’emprendissadi. El è be in da dus emprendists ch’i dat il mument en il Grischun. «Nus avain era ina pigna en chasa, e lura è il spazzachamin vegnì, e cura che jau hai tschertgà ina plazza sun jau ì a guardar ed i n’era betg schlet. Sinaquai hai jau scrit in’annunzia e lura èsi stà fatg.» El fetschia detg gugent la lavur ed el na savess betg tge ch’el veglia far auter per il mument.

Impressiuns dal di cun il spazzachamin

Spazzachamin fa oz dapli che pli baud

Anc avant 25 onns veseva la situaziun ora tut autra. Da lez temp devi en il Grischun anc 15 emprendists da spazzachamin, ha ditg Michael Hörler, il president da l’Uniun da spazzachamins Grischuna. En l’entira Svizra dettia actualmain 54 emprendists. Ideal fissi d’avair 80 – 100 emprendists, ha ditg Paul Grässli, il president dals spazzachamins Svizzers. Actualmain dettia ina tendenza positiva e dapli giuvenils veglian puspè emprender la professiun dal spazzachamin. Quai haja tranter auter da far cun l’attractivitad che creschia. Uschia saja il terz onn da l’emprendissadi pussaivel da sa spezialisar, per exempel era en la tecnica da ventilaziun ed indriz da stgaudar cun pumpa da stgaudar electrica. En l’entira Svizra lavuran actualmain radund 2’000 spazzachamins.

In sguard en noss archiv