Igl è stà da spetgar: Las pli grondas discussiuns hai dà enfin ussa pervia da la cultura aifer la debatta dal budget chantunal 2018. Tscherts vulan dapli promoziun culturala - auters pli pauc. Era il festival cultural Origen è stà en il focus dal Cussegl grond. La finala resta dentant tut sco proponì da la regenza.
1,4 milliuns francs dapli per la cultura
Il Cussegl grond suonda las propostas da la regenza grischuna e refusescha pretensiuns per dapli daners da promoziun (PS) sco era per scursanir la promoziun culturala (PPS). Nagina schanza ha era gì ina proposta dal deputà Lorenz Alig (PLD) da betg auzar la contribuziun per Origen da 200'000 sin 250'000 francs.
Per l'emprima giada mussa il budget las contribuziuns supplementaras per la cultura. Tenor retschertgas da RTR survegnan differentas instituziuns culturalas l'onn proxim en tut 1,4 milliuns francs dapli. Quai ha er il Departament da cultura dal Grischun confermà.
En la sessiun da favrer aveva il Cussegl grond refusà da fixar ina summa concreta en la lescha da cultura . Deputadas e deputads avevan decis lura da discutar onn per onn las contribuziuns en la debatta da budget.
Ina pitschna midada tar il budget hai tuttina dà. Tar l'Uffizi d'economia e turissem vegn stritgà 400'000 francs perquai che l'AWT na dovra betg quels daners per in studi previs. Cun questa proposta va dentant er la regenza d'accord.
«Il budget 2018 è equilibrà»
Quai è l'emprima construcziun en il rapport dal chantun – dal reminent in document che dumbra passa 300 paginas.
Cun 23,2 milliuns francs è il deficit en il rom da l'onn passà (20 milliuns francs). Las investiziuns planisadas muntan dentant in record: Brutto 446 milliuns francs vuless la regenza grischuna investir il 2018.
Surtut ils projects da construcziun (la praschun Realta a Cazas e la chasa per l'administraziun chantunala Sinergia a Cuira) van en ils daners.
Program da spargn cun u senza consultaziun?
Per l'emprima giada ha la ministra da finanzas tradì co ch'ella vul pigliar a mauns in program da spargn per ils onns suenter 2020. In emprim sboz haja la regenza discutà – dentant senza prender decisiuns, ha ditg Barbara Janom Steiner (PBD). I saja er pussaivel da realisar il program da spargn senza trametter quel en consultaziun.
Questa infurmaziun ha sveglià las emoziuns: Jan Koch (schef da fracziun PPS) ha menziunà, ch'el saja d'accord cun quest agir cunquai ch'in program da spargn fetschia preschas. Quai ha Conradin Caviezel (schef da fracziun PS) valità sco proceder impussibel.
Debattas, discussiuns ed emoziuns
La debatta da budget è adina er ina plattafurma per deputadas e deputads da pigliar il pled e da far attent nua ch'els vulessan sbursar dapli daners e nua spargnar. Igl è da quintar cun ina debatta da pliras uras – surtut 6 mais avant las elecziuns grischunas.
Las partidas PLD e PPS fan squitsch e pretendan da la regenza grischuna in concept cura ch'il chantun Grischun dovria propi in program da spargn.
Martin Aebli ha avert la sessiun da december
En ses pled d'avertura sco president dal Cussegl grond ha Martin Aebli menziunà las sfidas, cunzunt las sfidas en il turissem. Uschia ha el tranter auter fatg attent sin il squitsch dals pretschs. Entras pretschs bass vegnia tschertgà il success spert.
Ins emblidia dentant, che quellas mesiras gidian be a curta vista ed i na vegnian betg gudagnads giasts fidaivels. Tgi che gudognia giasts via il pretsch perdia er puspè via il pretsch è Martin Aebli persvas.
RR actualitad 12.00