L'emprim mez onn è il dumber da pernottaziuns sur quel dal 2019. Sch'i va uschia vinavant datti quest onn in record en Svizra.
En il Grischun guardì ora in zic auter. Tschertas regiuns han profità durant la pandemia da blers osps da la Svizra. Ussa profiteschan cunzunt puspè regiuns sco San Murezzan e Tavau che han blers osps internaziunals. Regiuns sco per exempel Lai, Flem/Laax, Val Müstair ed Arosa sentan ch'ils Svizzers e las Svizras van puspè dapli en l'exteriur. En cumparegliaziun cun avant corona guarda la situaziun dentant ora sumegliant. Anc manchian ils turists e las turistas da la China che n'èn anc betg enavos sin la fiera.
Sfidas restan era quest onn
La crisa da corona e la mancanza d'energia èn bain per gronda part surmuntadas, ma ì resta vinavant sfidas. Ils pretschs d'energia èn anc adina auts ed entras l'inflaziun han ils hotels d'investir dapli. Latiers vegn la mancanza da persunal en la branscha. Per che la lavur restia vinavant attractiva, stoppia era la paja constar, uschia il president da Hotelleriesuisse. Quai muntia tut en tut ch'ils pretschs dals hotels creschian. La branscha stoppia en il futur s'engaschar anc pli fitg da recrutar persunal e da tegnair attractiv la lavur en la hotellaria.
La meglra reclama è anc adina da far buna lavur e far quella cun plaschair. La reputaziun da nossa branscha sto esser positiva. Nus faschain gia bler, ma i dat anc adina bler lavur.