La zona d'industria regiunala Val Schons è in project da success. L'extraordinari vi da quest project saja, che practicamein tut las vischnancas da l'anteriur cirquit Schons sa participeschian e collavureschian, di Hans-Andrea Fontana, il president dal cussegl d'administraziun ch'è davent da l'entschatta da la partida.
L'emprim manaschi ch'haja bajegià a «Zups» tranter Ziràn ed Andeer saja stà il scrinari Dimi Mani da Pignia cun sia fatschenta «Mani Holzbau». L'entschatta haja dà resalvas, ed ins haja prest in zic stuì surplidar ils interprendiders da vegnir a bajegiar e forsa d'anc prender in zic dapli funs, di Hans-Andrea Fontana. Ma ins haja bainspert sentì: Ils manaschis indigens vulan s'engrondir.
Igl è fitg legraivel, co la zona d'industria regiunala Val Schons è sa sviluppada ils ultims 10 onns.
Actualmain porscha l'entira zona d'industria cun ils trais lieus lavur a tranter 45 e 50 plazzas a temp cumplain. Quai saja da gronda valur per l'entira val, di Hans-Andrea Fontana.
Lieu ideal a «Zups» per Bruno Loi transports
In dals emprims che ha bajegià a «Zups» tranter Ziràn ed Andeer è stà Bruno Loi cun sia interpresa da transport. Per il manaschi cun 12 camiuns, che porscha sur onn lavur per circa 8 fin 10 plazzas da lavur cumplainas è quai il lieu ideal che portia sulettamain avantatgs. Bruno Loi è fitg cuntent a «Zups».
I saja datiers da l'autostrada ed era datiers dad Avras, nua che Bruno Loi viva, e maina sper la fatschenta da transport in manaschi puril. Ina part da ses dus edifizis dat el a tschains ad ina stagnaria indigena. In'auter locatari impurtant da Bruno Loi è la Posta Svizra che maina la centrala regiunala da distribuziun da brevs a «Zups». La zona d'industria regiunala Val Schons haja ina fitg gronda impurtanza per l'entira regiun.
Pli paucs manaschis e pli paucas plazzas da lavur ch'ins ha, pli impurtanta è mintga singula. La zona d'industria regiunala Val Schons è in cletg per l'entira regiun.