La moziun per introducir in model da direcziun è vegnida inoltrada gia avant quatter onns. Igl ha duvrà duas lecturas dals singuls statuts per in model da direcziun che separa la strategia communala dals duairs operativs.
Avant quatter onns ha la suprastanza communala da princip sustegnì l'idea d'in tal model. La suprastanza nov’elegida ha bain elavurà ensemen cun ina cumissiun ils detagls ed il messadi correspundent en il senn da la moziun. Tuttina han els fatg la proposta da refusar in model da direcziun. In dals motivs principals è ch'i dettia cun ina direcziun in ulteriur stgalim hierarchic e quai na saja betg en il senn da l'idea oriunda da far tut pli simpel.
![Christoph Messmer (sanestra) e Maurin Malär Christoph Messmer und Maurin Malär](https://www.rtr.ch/static/cms/images/960w/c901ab.jpg)
Model spezial per Vaz
Il model «Vaz» è unics en Grischun. Sper ina direcziun e la suprastanza communala resta er il parlament, il cussegl communal. D'ina vart vulessan ins professiunalisar la vischnanca, da l'autra vart vegna tut pli cumplitgà, resumescha Maurin Malär, il president communal. Sia gronda critica: «Cun in CEO po er ir a perder il fieu per la vischnanca».
Christoph Messmer ch'ha inoltrà la moziun è dentant da l'opiniun che cun ina profesiunalisaziun da la vischnanca e cun seperar la part strategica da la part operativa gudognan tuts. Sch'i dovra in di betg pli il cussegl communal, vegni a sa mussar. Actualmain na saja quai dentant negin tema.
L'ultim pled en chapitel ha ussa ils 30 da zercladur il suveran a l'urna. Tar in Gea vegniss introducì il model da direcziun entschatta 2026.