La nova purschida “Shuttle da notg Lai-Alvra» è ina purschida da las vischnancas Alvra, Lantsch, Vaz e Curvalda. Uschia han ils responsabels da l’Auto da Posta Grischun infurmà a la sesida dal cussegl communal da mardi saira.
Ils bus da notg curseschan durant l’entir onn da venderdi sin sonda e da sonda sin dumengia, durant l’enviern perfin mintga di. Total èn quai 174 dis a l’onn. Ils bus che pon vegnir clamads cun ina app da l’Auto da posta curseschan tranter las 22:30 e las quatter la notg. Nov è era ch’i dovra simplamain in bigliet dal traffic public per duvrar il bus, valaivel è era l’abunament general senza da pajar in supplement.
Nagin urari fix
Clamà vegn il bus via ina app, sur telefon na po el betg pli vegnir clamà. Spezial è ch’il bus da notg na cursescha betg tenor in urari fix. Vegn il bus pustà, vegn inditgà da tge uras ch’il bus vegn al lieu giavischà. Il bus da notg vala per tut ils vitgs da las vischnancas che fan part. Quai vul dir, ch’ins po per exempel ir cun il bus era en lieus pli lontans sco Stierva u Alvagni.
Custs totals: 485'000'000 francs
Actualmain pajan las vischnancas participadas total 107’000 francs per la purschida dal bus da notg. Da nov ston las vischnancas pajar maximalmain 242’500 francs per la purschida. Quai dependa dentant sch’ils quartiers Sartons, Crapera e Sport survegnan il bus «da notg» gia a partir da las 18:30. Sche questa opziun vegn realisada u betg, sto la conferenza dal presidents da la Regiun Alvra anc decider.
Senza questa opziun è la cumpart da las vischnancas 197’500 francs. Sch’ils hotels sa participassan cun ina contribuziun, alura sa reducescha la cumpart dals hotels sin 177’500 francs. Avess era Cuira da sa participar, alura stuessan las vischnancas da Vaz, Lantsch, Alvra e Curvalda pajar total 157’500 francs per la purschida dal bus da notg. Che Cuira pudess da participar vi dal bus da notg ha da far cun il fatg, che Cuira profitass era da quest bus, cun quai che glieud da la Regiun Alvra pudess per exempel visitar occurenzas culturalas a Cuira.
Tut questas summas numnadas èn la cumpart che las vischnancas ston pajar. Il chantun paja la differenza da 50% che vegn anc vitiers. Uschia muntassan ils custs totals da la 485'000 francs.
Ils proxims pass
La conferenza da presidents da la Regiun Alvra e la vischnanca da Curvalda decidan sur da la fatschenta. Suenter vegn fatg ina dumonda per ina contribuziun dal chantun. Suenter duess l’uniun da hotels da la regiun da Lai vegnir dumandà per in sustegn finanzial. La fin finala vegnan ils custs repartids sin tuts che sa participeschan. La fin finala fa la Regiun Alvra ina cunvegna da prestaziun. Sche tut va tenor plan, duess il nov bus da notg ir en vigur gia la proxima midada da l’urari il december da quest onn.
Plinavant ha il cussegl communal da Vaz tractà il suandant
- En la partiziun construcziun vegn stgaffida ina nova plazza da 100% per la polizia da construcziun.
- La moziun Weber pretenda tempo 30 sin il territori da la vischnanca da Vaz per tut las vias communalas, inclus èn Lain, Muldain, Zorten, Sporz, Lai e Valbella. La suprastanza ha decidì ch’i na duess betg vegnir fatga ina procedura scursanida, la suprastanza duess persequitar ina procedura normala e prender si contact cun il chantun.
- Il postulat Berther pretenda la construcziun dad emprimas abitaziuns per indigens e novs residents. La suprastanza communala ha infurmà ch’ella lavuria intensiv vi da la pussaivladad da construir nov spazi d’abitar, quai dovria però ses temp.
- Il postulat Bläsi pretenda ina tur cun ina bella vista cun in ascensur en il conturn dal runal da Dieschen. La suprastanza communala na sustegna betg l’idea da Bläsi e na persequitescha betg l’idea. Medem vesa quai il cussegl communal, ch'ha refusà da surdar a la suprastanza il postulat.
