Dapi il december da l'onn passà èn Annatina e Roger Rieder-Hassler ils possessurs da l'Ustreia Orta a Lon. Schon adina hajan els ditg: sch'ils uffants sajan or da chasa, alura veglian els ir insanua en ils auts a viver, di Annatina Rieder-Hassler. Udì che l'ustaria è da vender hajan els plitost per schabetg che cun tschertgar activamain. Ils geniturs d'Annatina han l'october da l'onn passà festivà lur 70avel anniversari a Lon, e là haja l'ustier ditg che l'ustaria saja da vender.
L'emprim n'avain nus betg studegià grond ed anc fatg sgnoccas surlonder. Trais dis pli tard essan lura stads a guardar l'ustaria ed il december avain nus cumprà ella.
Ina nova aventura per il pèr
Ni Annatina ni ses um Roger derivan da la gastronomia. Els cuschinian omadus fitg gugent ed hajan gugent hosps. Questa stad han els rut giu las tendas a Favugn – nua ch'els han abità passa 20 onns – ed èn sa chasads a Lon, sin passa 1'500 meters sur mar. Per Annatina n'è il terren dentant betg dal tuttafatg nov. Ella ha numnadamain sias ragischs en la Val Schons. Ses bab è creschì si a Donat. Plinavant è Annatina stada sco buoba bleras giadas en vacanzas tar tat e tatta.
Jau hai ina gronda relaziun tar la Val Schons.
Manar l'Ustreia Orta è in'aventura per Annatina e Roger Rieder-Hassler. Ina gronda ristga saja quai dentant betg, damai ch'omadus lavuran anc parzialmain dasperas. L'ustaria ha 20 fin 25 plaz dadens ed anc ina giada circa uschè blers sin terrassa cun vista sur la Val Schons. Avert han els mintgamai venderdi fin dumengia. Els stoppian uss ina giada guardar co quai marscha e funcziuna.
Suenter bleras preperativas semtgads per l'avertura
En quest mez onn ch'els han uss gì temp per las preparativas han Annatina e Roger Rieder-Hassler gì pulit da far. Ils bogns en las duas chombras dublas dal «Bed & Breakfast» – sco era quel en l'abitaziun dals ustiers – èn vegnids renovads. En cuschina saja stà da midar in u l'auter indriz e l'entira electrica. Era tut las glischs èn novas.
La cuschina duai esser stagiunala e regiunala, uschia derivian divers products pia era dals purs dal vitg. Durant las preparativas e renovaziuns han ils novs ustiers era gia gì contact cun ils indigens.
Ils indigens che nus avain entupà sin via han plaschair e sa legran che l'ustaria dal vitg avra puspè sias portas.
In di avant l'avertura han Annatina e Roger Rieder-Hassler envidà ils da Lon per guardar sco l'ustaria vesa or e tge ch'els han tut midà. Surtut ina chaussa fetschia surstar: Schebain ch'els n'hajan naginas fotografias e mo in text cun ina curta descripziun da las duas chombras dublas da «Bed & Breakfast» sin lur pagina d'internet, hajan els gia ina pluna reservaziuns per ils proxims mais.
Er il president communal da la Muntogna da Schons, Marco Dolf, è cuntent ch'ins ha chattà ina schliaziun per l'ustaria a Lon.
Igl è surtut impurtant per quels da Lon. Ma era per la vischnanca èsi impurtant, ch'in po mantegnair quellas ustarias che nus avain.
