Sin l’idea da cultivar triflas, il bulieu da delicatessa che vegn oravant tut duvrà ella gastronomia da stailas, ston ins sco emprim vegnir. La pura Andrina Bisaz e ses um Urs Horni èn suandads il cussegl d’in student d’agronomia che ha scrit sia lavur da bachelor sur dal bulieu custaivel: Els han ristgà avant 9 onns da cultivar la trifla naira da la Burgogna sin lur terrain.
Sin ina da lur meglras parcellas sper lur puraria han els plantà sin 45 aras radund 600 plantas vaccinadas cun sporas da trifla. Quai eran per exempel faus, ruvers, nitscholers u tieus. Ils emprims 7 onns han ellas mo chaschunà custs e lavur. Mintg’onn han Andrina Bisaz ed Urs Horni tgirà quellas, cumbattì las mieurs che magliavan las ragischs, protegì las plantas cunter donns da tschiervs e chavriels e tractà ellas cunter malsognas.
Avant dus onns lura l’emprim success cur ch’els han chattà l’emprima trifla. Quai è stà per l'entira famiglia sco anniversari e Nadal ensemen. Entant racoglian els per bainquant dapli. Quest onn quintan els d’anflar radund 6 kg triflas - ed ils proxims onns anc dapli.
Cuntrari a la gronda part dals products agriculs e da las metodas da racolta na dovri nagin agid da maschinas per racoltar las triflas. Per chattar quellas han Andrina ed Urs agid da lur dus chauns Indy e Tara ch'èn scolads per quest intent. Sch'els han ina giada savurà ils bulieus, vegnan els chavads ora a maun e la fora ch'è sa furmada vegn puspè cuvrida. Uschia pon ulteriuras sporas crescher senza disturbis tar triflas ed il terren resta intact.
Tranter 80 fin 100 francs custan 100 grams triflas da Bogn Ragaz. Divers restaurants da gourmet da la regiun appartegnan gia tar lur clientella.
Per lur project ambiziunà ed unic èn els uss nominads per in dals gronds premis d’agricultura da la Svizra: Il premi Agro da lecturs. Quel vegn surdà quest onn gievgia, ils 7 da november 2024 a Berna.
