Cun 64 onns s'ha Claudio Gregori accumplì in pitschen siemi. Chaminar cun in asen tras la champagna, senza squitsch da temp, senza plan. Simplamain ir e giudair. Dapi onns ha il pastur e president da Bio Grischun gì l’idea da far quai – uss han el e l'asen Armani terminà il viadi ed èn gia puspè envaos a chasa.
Durant trais mais ha el preparà il viadi, ha chattà in asen da trekking en la Val Müstair ch’el ha pudì emprestar per sia aventura. Ina sfida aveva el gia avnat che partir, num nadamain il fatg ch’el ha stuì laschar operar ses dus schanugls avant intgins mais ed era al cumenzament dal viadi anc adina vi dal sa revegnir. Ma cun quai ch’el n'ha betg planisà rutas ed etappas ha el pudì prender tut patgific.
Cun camiunetta fin giudim il stival da l’Italia
Enstagl da partir davent da chasa è el ì cun ses asen bundant 1'500 kilometers en il sid, fin giudim la Calabria. Cun quai ch’il pastur passiunà ha vulì esser da return per l’entschatta da la stagiun d’alp ed era perquai ch’el vuleva gia daditg emprender ad enconuscher quella regiun, ha el cumenzà ses viadi cun laschar transportar el e l’asen Armani cun ina camiunetta. Copilot è stà Reto Raselli ch'è lura puspè returnà cun la camiunetta.