Dasper la surdada uffiziala dal label datti in concert e spaisas e bavrondas. Las 10:30 cumenzan las festivitads uffizialas: la surdada tras l'UNICEF ensemen cun ils scolars e las scolaras da Surses.
Las stentas èn vegnidas onuradas
En in lung process en collavuraziun cun l’associaziun tetgala chantunala jugend.gr è Surses sa fatschentà cun ils temas promoziun, participaziun e dretg da la giuventetgna e dals uffants. Sco quai che la vischnanca da Surses scriva en ina communicaziun, haja dà in plan da mesiras: Dar ina vusch ad ils uffants e giuvenils, laschar participar els ed ellas tar las fatschentas, ed en general augmentar lur autoefficacitad: d'avair in effect sin sa sez e ses conturn.
Emprimas mesiras sajan gia pigliadas per mauns: fundar in cussegl d’uffants en la scola, rimnar ideas per il nov bajetg da scola u realisar cun ils uffants il pumptrack a Savognin. Ulteriuras mesiras suondian.
-
Bild 1 von 4Legenda: Pumptrack a Surses RTR -
Bild 2 von 4Legenda: Plaz d'ir cun skateboard RTR
-
Bild 3 von 4Legenda: Label dal Parc Ela per il parc per promover la biodiversitad RTR
-
Bild 4 von 4Legenda: RTR
Muntada dal label
Unicef Svizra e Liechtenstein premiescha vischnancas che megliereschan sistematicamain lur bainvulientscha envers uffants ed obtegnan resultats visibels per uffants e giuvenils. Per l’emprima giada surdat UNICEF Svizra e Liechtenstein ussa il label «Vischnanca bainvulenta envers uffants» ad ina vischnanca grischuna.
Giancarlo Torriani, il schef dal departament da scola da Surses vegn cità en la communicaziun: «Quella distincziun ans fa grond plaschair ed ans motivescha. Nus vulain ans engaschar per ils noss uffants, per giuvnas e giuvens. Ellas ed els èn il noss futur. Il label è la paja per la lavur prestada enfin ussa ed a medem temp l’obligaziun da persequitar la via pigliada. I dat da far anc bler!»
Er jugend.gr ha plaschair da la distincziun. Chantal Bleiker, la manadra da project jugend.gr s’exprima: «La surdada dal label a la vischnanca Surses mussa ch’il noss project Participaziun dals uffants e dals giuvenils en las vischnancas grischunas fa effect. Nus gratulain a las persunas pertutgadas e sustegnain la vischnanca cun las sias intenziuns, uschia ch’i gartegia da crear communablamain l’avegnir.»