400'000 liters latg da bio vegnan elavurads ad onn en la nova chascharia. Da quella quantitad derivan circa 255'000 liters da vatgas, 120'000 liters da chauras e 25’0000 liters da nursas. Il signun è Michael Sturm. Sco quai ch’el ha tradì envers RTR, fascinescha el ch’el possia lavurar gist cun trais differents tips da latg. Quai fetschia sia lavur pli interessanta, ma era pli pretensiusa.
Diversas sfidas
Il president da la societad cooperativa Sufers Markus Meuli ha ditg ch’igl haja duvrà blers sforzs per pudair realisar la chascharia. Survegnir tut las lubientschas saja stà tut auter che simpel, ed era da chattar in signun che maina la chascharia sin agen quint na saja betg gartegià. Perquai vegnia la chascharia ussa manada direct da la cooperativa dals purs, ha ditg Meuli. En la butia en la chascharia datti da cumprar radund ina tozza differents chaschiels. Il project da la nova chascharia ha pudì vegnir realisà cun agid dal program dal svilup regiunal PRE dal chantun.