La stad 2019 ha mussà er a Spleia la fermezza d'aua gronda. Il Hüscherabach ha inundà parts da la vischnanca ch'è er vegnida evacuada per part. Duas persunas han pudì vegnir salvadas il davos mument. Ellas eran cun lur camper a l'ur dal flum. Christian Simmen ha surpiglià quest'onn il presidi commmunal, e per el saja stà cler ch'ina protecziun d'aua gronda saja da priorisar. Che l'Uffizi da vias federal ASTRA planisescha ina nova organisaziun da la circulaziun dal traffic per l'autostrada A13 a Spleia saja segir er in motiv per realisar ussa la protecziun d'aua, di Simmen.
Coordinar las lavurs grondas
Sche tut va tenor plan vegn Spleia ad esser ils proxims onns in lieu cun blers plazzals da construcziun. Impurtant saja da coordinar bain questas lavurs che l'ASTRA fa per l'access e la sortida sin l'A13 e las lavurs da la protecziun d'aua. Cun esser pertutgada la vischnanca, il chantun cun la via chantunala e spezialmain l'autostrada naziunala saja bain da quintar cun gronds disturbis, ma cun coordinar saja er pussaivel dad esser a fin cun tut en il meglier cass il 2029.
Blers projects gronds
La vischnanca Valragn ha ils proxims onns da realisar e finanziar plirs projects gronds. Sper la protecziun d'aua gronda er la sanaziun totala dal provediment d'aua da Spleia e Medels e rempars da lavinas. Uschia saja la vischnanca er adina a la tschertga da funtaunas finanzialas. Ina da quellas saja il padrinadi da vischnancas da muntogna che deliberescha regularmain agids finanzials per tals projects.