Spleia - La fermada è daventada ina sala da concert

So quai che Luisa Baselgia dal post da cultura da la vischnanca Spleia ha ditg, saja il clavazin da la marca «Wohlfahrt» ina grond’attracziun a Spleia. I dettia schizunt passagiers da l’auto da posta che fetschian in stop supplementar a Spleia per sunar in per tocs sin il clavazin.

Tar ina visita che RTR ha fatg tar la staziun da l’auto da posta visavi da la scola, han indigens ditg ch’els fetschian mintgatant ina pausa tar il clavazin per sunar in per tuns. Ina scolara primara cun num Ladina ha ditg ch’ella haja grond plaschair da sunar il clavazin. Adina sche pussaivel sunia ella qua, cura ch’ella spetgia sin l’auto da posta per ir a Medel Valragn. Ma il mument saja schon in pau fraid da sunar, manegia ella.