Scharàns - Via dal Meir curclada vegn liberada dal grip

La senda colliescha Scharàns e Muldain, e vegn cunzunt nizzegiada per ir cun velo e per viandar. Ils custs da la reparatura da la senda pajan las dus vischnancas lung da la senda, vul dir Scharans e Vaz. Vi da la sanaziun sa participescha era il chantun. Sco quai che Silvio Pellegrini – il manader da la sanaziun da la firma Pellegrini Bauleitungen ha ditg envers RTR – sajan las lavurs da siglientar e reparar da la senda s’avanzads tenor plan. Ins haja entschet la fin d’avrigl cun las lavurs. Ina sfida saja da siglientar uschè da manaivel da lingias da tensiun auta.

I dovra bleras siglientadas

Il maister siglientader Renato Bühler da la Crestageo SA ha ditg, ch’i dovria en tut radund 50 siglientadas. Sco quai ch’il president communal da Scharans Werner Preisig ha ditg, saja bel ch’ins possia prubablamain il mez da zercladur puspè avrir la senda. Quella saja da grond’impurtanza per ils velocipedists e viandants, che vegnian gugent sin la senda. A lunga vista ins pondereschia, da schizunt pudair construir in tunnel che pudess guntgir la zona difficila che consista da plattamorta grischuna. Ma pervi dals custs d’almain 1.5 milliuns francs, ins emprovia per il mument da mantegnair la senda uschia sco quai ch’ella saja concepida per il mument, ha Preisig ditg plinavant.

La senda colliescha Scharàns e Muldain, e vegn cunzunt nizzegiada per ir cun velo e per viandar. Suenter che la bova ha la vischnanca da Scharàns laschà intercurir geologs e geologas il grip, avant da discutar davart lavurs da reparatura e construcziun.

Il mars duain las lavurs da rumir e sanar la via sin la vart da Vaz cumenzar. La repartiziun da custs tranter las vischnancas da Vaz e Scharàns ed il chantun vegn anc decidida. La vischnanca da Scharàns spera dentant che 60% dals custs vegnan subvenziunads.