Sco quai ch’il nov possessur scriva a las medias, vul el malgrà in temp difficil per la hotellaria far tut il pussaivel che manaschis existents na stoppian betg serrar e survegnian uschia in futur persistent. Cumprà ha Oliver Bühler sper il hotel Danilo era ina chamona da skiunzs a Radons che porscha plaz a radund 25 persunas.
Direcziun dal hotel Arlos maina ussa era il Danilo
La direcziun dal hotel Danilo surpiglian Cornelia e José Diaz-Demarmels che mainan gia il hotel Arlos a Savognin. Il possessur dal hotel, Oliver Bühler, ha fundà duas societads d’aczias: la «Cjo SA» (immobiglia) e la «Cjoo SA» (manaschi dal hotel). A lunga vista saja previs ch’il pèr che gestiuneschia il Danilo possia surpigliar era las duas societads d’aczias.
![Da san.: Cornelia (Coco) Diaz Gonzalez-Demarmels, José Diaz Gonzalez-Demarmels, Clarita Klee-Pianta, Oliver Bühler.](https://www.rtr.ch/static/cms/images/960w/931c69.jpg)
Avegnir dal hotel Pianta anc intschert
Betg part dal pachet d’investiziun da Oliver Bühler fa il hotel Pianta che sa chatta vis-à-vis il hotel Danilo. Il hotel Pianta resta vinavant en il possess da la famiglia Klee-Pianta. La famiglia saja il mument vid examinar aifer la famiglia, tge soluziun per l’avegnir che saja la meglra.