Il suveran da Lai ha ditg Na a la nova cunvegna surlavurada da prestaziun cun la Lai Marketing Support SA. Questa interpresa ha sco finamira da promover il turissem da la regiun da vacanzas Lai.
In scopo fiss stà da midar il document uschia, ch'i dess be anc ina cunvegna medema tranter ils cumins partenaris, Vaz, Lantsch e Churwalden cun la Lai Marketing e Support SA. Quest pass avess gì da simplifitgar l’administraziun e finanziaziun per la Lai Marketing Support SA, di Phillip Vassalli, il mainagestiun.
Finanziaziun cumplitgada
La cunvegna veglia da Vaz cun la Lai Marketing e Support SA, che resta vinavant en vigur dat a la organisaziun gia oz trais milluns francs. Cun custs supplementars, che muntan circa 197’000 francs per onn, è la contribuziun da Vaz la pli auta da las trais vischnancas che pajan. Sche l'organisaziun dovra dapli daners per tscherts projects, ston els ir a dumandar las trais vischnancas partenarias quests raps. Quai avess midà cun la nova cunvegna. Pia dumandar ulteriuras contribuziuns na fiss betg pli stà necessari.
Nova cunvegna avess purtà surlevtg
Cun in total da 3.35 milliuns francs fiss la nova cunvegna stada tut inclusiv. Phillipp Vassalli inditga cha questa cunvegna avess sbassà er la lavur administrativa. Ma ils da Vaz han refusà. Ensemen cun lur partenaris vul la Lai Marketing e Support SA sco emprim analisar la decisiun ed ir vinavant sco fin uss.
