La regenza ha approvà il project da las vischnancas Tschappina, Urmein, Cazas, Masein, Tusaun e Seglias per sanar ils rempars da la Nolla, quai cun intginas cundiziuns e lubientschas. Ils custs totals dal project muntan a radund 4 milliuns francs. Da quests custs surpiglia il chantun 800'000 francs tenor la lescha da construcziun per auas. Cun il project vegn dentant er protegida la via. Perquai conceda la regenza ulteriurs 180'000 francs sco contribuziun da construcziuns da vias.
La Nolla nascha a la flanca da l'ost dal Piz Beverin, da là cula l'aual vinavant e rimna er l'aua da Mantogna, va fin a Tusaun e lura en il Rain Posteriur. Il terren da quest territori consista da plattamorta grischuna, pia in terren fitg instabil. Uschia na stattan las varts da la val mai salda. La Nolla ha perquai ditg valì sco in dals auals ils pli privlus da la Svizra. Ils rempars vegnan perquai er controllads regularmain. En il rom da questas controllas han ins lura constattà che sis da quels rempars èn donnegiads sin ina lunghezza dad 1,9 kilometers. Per pudair garantir la segirezza er en avegnir, ston quels ussa vegnir sanads.
